O‘zbekiston moliya bozori yashil instrumentlarining joriy holati va istiqbollari

Аннотация

O'zbekistonning ekologik va iqtisodiy holati so'nggi yillarda jiddiy o'zgarishlar va rivojlanishlarni talab qilmoqda. Global iqlim o'zgarishlari, tabiiy resurslarning taqchilligi va atrof-muhitning zaharlanishi kabi muammolar insoniyatni yangi iqtisodiy modellarni qidirishga undamoqda. Yashil iqtisodiyot konsepsiyasi, resurslarni barqaror boshqarish va atrof-muhitni muhofaza qilishni maqsad qilib qo'yadi. O'zbekistonda yashil iqtisodiyotni moliyalashtirish instrumentlarini keng joriy etish, mamlakatning iqtisodiy o'sishini barqaror va ekologik jihatdan toza qilishda muhim ahamiyatga ega. Sayyoramizning so'nggi yigirma yillik davrida atrof-muhitdagi tabiiy resurslardan oqilona foydalanmaslik natijasida ularning taqchilligi, iqlim o'zgarishi va bioxilmaxillikning yo'qolishi kabi ko'plab global muammolar yuzaga keldi. Ushbu muammolar ijtimoiy tengsizlikni oshirish, iqtisodiy va siyosiy holatga ta'sir ko'rsatishi bilan bog'liq. Ekologik muammolarni hal etishda aholi ishtiroki muhim ahamiyatga ega. Shuning uchun, so'nggi yillarda global moliya bozorida "yashil iqtisodiyot”, "yashil moliyalashtirish”, "yashil instrumentlar” kabi terminlar keng tarqalmoqda. Bu terminlar tabiiy resurslardan oqilona foydalanish, atrof-muhitga salbiy ta’sirni kamaytirish va kelajak avlodlar uchun farovon iqtisodiyotni ta'minlash kabi strategik maqsadlarni anglatadi.