RAHBAR KOMMUNIKATIV FAOLIYATINI TAKOMILLASHTIRISH (texnikum, kollejlar va kasb-hunar maktablari misolida)

Аннотация

Dissertatsiya mavzusining dolzarbligi va zarurati. XXI asrda ta’lim bo‘yicha xalqaro komissiya dunyoda insoniyatning kelajakdagi taraqqiyoti iqtisodiy omillarga emas, balki shaxsning rivojlanish darajasiga bog‘liq degan xulosaga keldi. YUNESKO an’anaviy “inson resurslari” tushunchasidan “inson kompetensiyasi” tushunchasiga o‘tishni taklif qildi. Ushbu kompetensiya inson manfaatlarini maksimal darajada, har tomonlama hisobga olishni nazarda tutadi: sog‘liqni saqlash va yaxshilash, madaniyatni rivojlantirish, atrof-muhitni muhofaza qilish, mehnat bozorida raqobatbardoshlikni oshirish uchun zarur bo‘lgan kasbiy kompetensiya, bilim, ko‘nikma va malakalarni o‘zlashtirish, jahon ta’lim tizimida ta’lim sifatini boshqarish jarayonlarini modernizatsiya qilish, ta’lim muassasasi rahbarining boshqaruv faoliyati amaliyotiga fanning eng so‘nggi yutuqlarini joriy etish, ta’lim jarayonining subyektlari uchun barqaror muvaffaqiyat holatini yaratish, ta’lim muassasasi hamda o‘qituvchi nufuzini oshirish va vakolatlarini mustahkamlash, nafaqat ijtimoiy-iqtisodiy va axborot, balki psixologik, pedagogik va axloqiy boshqaruv omillarining ahamiyati ortib borish tendensiyasi kuzatilmoqda. Rahbarning nafaqat shaxsiy sifatlari, balki uning kasbiy madaniyati va mahoratiga e’tibor ortib bormoqda.