Ўзбекистонда қайта суғурталашни такомиллаштириш йўллари

Аннотация

Диссертация мавзусининг долзарблиги ва зарурлиги. Жаҳон иқтисодиётида COVID - 19 пандемияси натижасида юз берган бир қатор салбий оқибатлар «2020 йилда глобал иқтисодиёт ҳажмининг 3,4 фоизга қисқаришига олиб келганди». Жаҳон банкининг маълумотларига кўра «2021 йилга келиб жаҳон иқтисодиётида сезиларли жонланиш кузатилиб, иқтисодиётнинг ўсиш кўрсаткичи 5,5 фоизни ташкил қилади, лекин пандемияни келтириб чиқарган вирус янги штаммларининг пайдо бўлиши ҳамда маҳаллий иқтисодиѐтни қўллаб-қувватловчи бюджет-молия дастурларининг ниҳоясига етиши натижасида 2022 йилда иқтисодий ўсиш кўрсаткичи 4,1 фоизгача пасайиши таҳмин қилинмоқда». Шу ўринда қайд этиш лозимки, дунёдаги пандемик вазият иқтисодиётда мавжуд бўлган ва янги юзага келган рисклардан ҳимояланишга бўлган заруратни оширди. Натижада, «2021 йилда дунёда суғурта хизматларига бўлган талаб 3,3 фоизга ошган ҳамда 2022 йилда яна 3,9 фоизга ошиши кутилмоқда». Мазкур ҳолат, суғурта ва қайта суғурта ташкилотларидан мавжуд иқтисодий шароитга мос янги маҳсулотларни ишлаб чиқиб таклиф этишни талаб қилмоқда. Шу сабабли, глобал даражада суғурталаш ва қайта суғурталаш механизмларини такомиллаштириш, суғурта рискларини баҳолаш самарадорлигини оширувчи янги инструментларни яратиш, кўплаб давлатларда кузатилаѐтган инфляция ва шу каби макроиқтисодий муаммолар юзага келаётган бир вақтда суғурта рискларини бошқариш йўлларини ишлаб чиқиш долзарб аҳамият касб этмоқда.