QORAQALPOG‘ISTON RESPUBLIKASIDA DIDAKTIK QARASHLARNING SHAKLLANISHI VA RIVOJLANISHI (kimyo fani misolida)

Аннотация

Dissertatsiya mavzusining dolzarbligi va zarurati. Jahonda ta’lim barqaror taraqqiyotni ta’minlaydigan asosiy omil sifatida e’tirof etilib, 2030-yilgacha belgilangan xalqaro ta’lim konsepsiyasida “bilimning mustahkam poydevoriga ega bo‘lish, rivojlanishini ta’minlash, ijodiy va tanqidiy fikrlash hamda hamkorlik qobiliyatlari va qiziquvchanlik, jasorat va chidamlilikni kuchaytirish” dolzarb vazifa etib belgilab olindi. Innovatsion iqtisodiyotni rivojlantirishda tabiiy fanlarni o‘qitish samaradorligini oshirish, ayniqsa, integrativ tavsifga ega kimyo ta’limini rivojlantirishning an’anaviy va innovatsion texnologiyalarini uyg‘unlashtirish muhim ahamiyat kasb etadi. Hududlar kesimida kimyo ilmi rivojining asosiy tendensiyalarini aniqlashtirish, ayniqsa, kimyoning taraqqiyotiga katta hissa qo‘shgan Markaziy Osiyo mutafakkirlari va olimlarining ilmiy-pedagogik qarashlarini tadqiq etishga xalqaro miqyosda katta e’tibor qaratilmoqda.