Сурункали буйрак касаллиги бўлган беморларда бўлмачалар фибрилляциясида антикоагулянтларнинг қўлланилиши

Аннотация

Дунё миқиёсида сурункали буйрак касаллигининг III-V босқичларидаги беморларни кўпинча аритмияларни даволаш бўйича ўтказиладиган рандомизацияланган илмий текширувларга киритишмайди, лекин бу ҳолат ҳозирги кунда ўзгариб боряпти. Ҳозирги кунда кардиологларнинг юрак-қон томир касалликлари жамияти консенсуси бўлмачалар фибрилляцияси ва сурункали буйрак касаллигини даволашдаги бу бўшлиқ борлигини тан олди. Бундай коморбид беморларни олиб бориш усулларини ва даволашни оптималлаштириш, асоратлар профилактикасининг самарадорлиги ва хавфсизлигини оширишнинг асосий жиҳатларини ишлаб чиқиш мақсадида бир қатор илмий тадқиқотлар олиб борилмоқда. Шу билан бирга, тромбоэмболик асоратлар туфайли юзага келувчи ногиронликлар ва ўлимлар сонини камайтириш мақсадида хавф омилларини эрта ташҳислаш, бундай коморбид ҳолатдаги беморларни самарадор ва хавфсиз дори воситалари билан даволаш ҳамда уларнинг ҳаёт сифатини яхшилашга қаратилган чора-тадбирлар комплексини ишлаб чиқиш амалий тиббиётнинг долзарб йўналишларидан ҳисобланади.