O‘ZBEKISTON RESPUBLIKASINING JINOYAT HUQUQI

Аннотация

Jinoyat huquqi – mustaqil huquq sohasi bo‘lib, O‘zbekiston Respublikasi huquqiy tizimining ajralmas qismidir. Jinoyat huquqi, huquq tizimini tashkil qiluvchi boshqa sohalar – konstitutsiyaviy, fuqaroviy, ma’muriy, jinoyat-ijroiya va shu kabilar bilan birgalikda jamiyatda shakllangan ijtimoiy munosabatlarni tartibga solishga mo‘ljallangan. Shu bilan birgalikda boshqa huquq sohalaridan farqli ravishda, jinoyat huquqi o‘zining bu vazifasini o‘ziga xos tarzda bajaradi: eng muhim va ahamiyatli ijtimoiy munosabatlarni maxsus usul va vositalar bilan qo‘riqlaydi, shu bilan ularning normal faoliyat ko‘rsatishini ta’minlaydi, maqsadlarga muvaffaqiyatli erishish uchun zarur bo‘lgan sharoitlarni yaratadi, jamiyat ijtimoiy hayotining barcha asosiy sohalarida – ijtimoiy, iqtisodiy, siyosiy, ma’naviy va boshqa yo‘nalishlarda keng qamrovli islohotlarni amalga oshirishdagi birlamchi vazifalarni bajaradi.