ДАВЛАТ БЮДЖЕТИНИНГ ЯГОНА ҒАЗНА ҲИСОБВАРАҒИДАГИ МАБЛАҒЛАРИНИ БОШҚАРИШ МАСАЛАЛАРИ

Аннотация

Ўзбекистон Республикасида иқтисодиётнинг эркинлашуви давлат бюджетининг мамлакатни ижтимоий-иқтисодий ривожлантиришдаги ўрни янада ортмоқда. Мамлакатимизда Давлат молиясини бошқариш борасида жадал ислоҳотлар олиб борилмоқда. Айнан, давлат бюджети ижросига ғазначилик тизимининг босқичма-босқич жорий қилиниши юзага келаётган кўплаб муаммоларни ўз вақтида ҳал этиш билан бир қаторда, уларни олдини олиш учун қўшимча имкониятларни яратди. Республикамизда давлат бюджети ижроси учун масъул, янги институционал тузилма ҳисобланган ғазначилик органлари Ўзбекистон Республикаси Президентининг 2007 йил 28 февралдаги 594-сонли “Давлат бюджетининг ғазна ижроси тизимини янада ривожлантириш чора-тадбирлар тўғрисида”ги Қарори билан ташкил этилди. Ушбу Қарор билан ғазначилик органларининг асосий вазифалари белгилаб берилган бўлиб, улардан бири тегишли бюджетлар даромадлари ва харажатлари ўртасидаги касса узилишларининг олдини олишни таъминлайдиган ягона ғазначилик ҳисоб рақамида бўлган Давлат бюджети маблағларини бошқариш ҳисобланади.“..Қатор йиллар давомида кузатилган бюджет профицити, расмий захиралар даражасининг юқорилиги, давлат қарзининг камлиги, барқарор банк тизими ва халқаро молия бозорларидан қарз олишга эҳтиёткорлик билан ёндашиш мамлакатни глобал инқирознинг бевосита оқибатларидан ҳимоя қилди”