Параллел корпусда ўхшатишларнинг лексик- семантик муносабатлари тадқиқи

Аннотация

Диссертация мавзусининг долзарблиги ва зарурати. Жаҳон таржимашунослигида компьютер ва ахборот технологиялари ёрдамида икки тилли ва кўп тилли параллел ҳамда қиёсий тил корпусларидан фойдаланиш таржима таҳлилларини олиб бориш ҳамда тезаурус луғатларини тузиш имкониятларини кенгайтирмоқда. Таржимада электрон луғатлар, машина таржимасидан фойдаланиш жараённинг тез ва самарали бўлишига хизмат қилиш билан бирга, янги илмий муаммоларни ўрганишга бўлган эҳтиёжни ҳам келтириб чиқармоқда. Машина таржимаси тизимлари, автоматлаштирилган луғатлар, терминологик маълумот банкларини яратиш параллел матнларни тадқиқ ва таҳлил қилишни талаб қилади. Бу эса бутун дунё бўйлаб маълумот алмашиш ва параллел матндан фойдаланишда параллел корпусларни тадқиқ қилиш ҳамда улардан олинадиган натижаларни мукаммаллаштиришни тақозо этади.