ЭКСПЕРИМЕНТАЛ ЯРАЛИ КОЛИТ ФОНИДА ЖИГАР ФУНКЦИЯСИ ВА ГОРМОНАЛ ДИСБАЛАНСНИНГ ЭНДОМЕТРИЙ ГИПЕРПЛАЗИЯСИГА ТАЪСИРИ

Аннотация

Ушбу мақолада экспериментал ярали колит (ЭЯК) каламушларда жигар фаолияти ва эстроген метаболизмига қандай таъсир кўрсатиши, шунингдек, ушбу омилларнинг эндометрий гиперплазияси билан боғлиқлиги таҳлил қилинган. Ярали колит – ичакнинг сурункали яллиғланиш касаллиги сифатида организмнинг турли тизимларига, жумладан жигар фаолияти ва гормонал мувозанатга ҳам тизимли таъсир кўрсатиши мумкин. Тадқиқот давомида ЭЯК сунъий равишда индукция қилинган каламушлар устида экспериментлар ўтказилди. Жигар тўқималарида морфологик ўзгаришлар баҳоланди, эндометрий гиперплазиясида ER маркери орқали иммуногистокимёвий таҳлиллар олиб борилди. Натижалар шундан далолат бердики, ЭЯК жигар фаолиятида жиддий бузилишларга олиб келади ва бу ўз навбатида эстроген даражаси ҳамда унинг метаболизмига таъсир кўрсатади. Бундан ташқари, ЭЯК бўлган каламушларда эстроген метаболизмидаги бузилишлар ва эндометрий гиперплазиясининг ривожланиши ўртасида юқори даражадаги корреляция кузатилди. Бу маълумотлар яллиғланиш жараёнлари орқали ичак касалликлари репродуктив тизимга ҳам таъсир кўрсатиши мумкинлигини кўрсатади. Олинган натижалар ичак касалликлари билан гормонал ўзгаришлар ўртасидаги боғлиқликни чуқур ўрганиш зарурлигини таъкидлайди, бу эса клиник амалиёт ва касалликларни даволашнинг янги ёндашувларини ишлаб чиқишда муҳим аҳамиятга эга.