Umumiy o‘rta ta’limda „Hayotga muhabbat“ asarini o‘rgatish texnologiyalari

Аннотация

Jek London – jahon adabiy nasrida oʻz oʻrniga ega boʻlgan ajoyib realist ijodkordir. Xalq ommasining oʻz huquqlari uchun kurashishini, mavjud jamiyat illatlarini, inson va tabiat munosabatlarini mohirona yoritib bera olgan ushbu amerikalik adib XX asrning buyuk soʻz san’atkorlaridan boʻlib qoldi. Oʻzbek tilida „Martin Idеn“, „Qish haqida“, „Hayotga muhabbat“ asarlari chop etilgan yozuvchining hayoti va ijodi bilan oʻquvchilar bugungi kunda umumiy oʻrta ta’lim bosqichidanoq tanishib boradilar. Oʻrta ta’lim muassasalarining 10-sinfi va oʻrta maxsus, kasb-hunar ta’limi muassasalarining oʻquvchilari uchun chop etilgan „Adabiyot“ darslik-majmuadan yozuvchining qisqa tarjimai holi hamda „Hayotga muhabbat“ hikoyasi oʻrin olgan. Jek London hayoti va ijodini oʻrgatishga bagʻishlangan adabiyot darslarida oʻqituvchi Davlat ta’lim standarti va oʻquv dasturidan kelib chiqib, belgilangan 2 soat davomida „Jek Londonning XX asr Amerika adabiyotining yirik namoyandasi ekanligi; yozuvchi asarlarida chuqur badiiy tahlillar orqali betakror obrazlarning yaratilganligi; „Hayotga muhabbat“ hikoyasi inson irodasi va ishonchiga bag‘ishlangan asar ekanligi“ masalalarini yoritib berishi, shu orqali oʻquvchilarni jahon adabiyoti an’analari bilan hamda tanishtirishga, ularda sabr-matonat, ertangi kunga ishonch kabi ijobiy sifatlarni rivojlantirishga erishmogʻi lozim boʻladi