Болаларда гипоспадияни бир босқичли жарроҳлик даво натижалари

Аннотация

Гипоспадия – болаларда сийдик-таносил тизими ва жинсий олатнинг энг кенг тарқалган туғма нуқсонларидан ҳисобланади. Сўнгги ўн йилликларда гипоспадия билан туғилган ўғил болалар сони сезиларли даражада ошди. Агар 1960–70-йилларда ушбу норасоликнинг учраш салмоғи янги туғилган чақалоқларда 1:300–500: нисбатни ташкил этган бўлса, ҳозирги вақтда гипоспадиянинг турли шакллари билан болаларнинг туғилиш частотаси ортиб, турли муаллифларнинг тадқиқотларига кўра, 1:125-150 нисбатни ташкил этмоқда. Гипоспадияни жарроҳлик даволашнинг замонавий усуллари “неоуретра”ни яратиш, олат эгрилигини бартараф этиш, шунингдек жинсий олат терисини қайта тиклашга кенг имкониятларни беради. Бироқ, жарроҳлик усулни танлаш аксарият ҳолларда бемордаги жинсий олатни тузилишини субъектив баҳолашга, шунингдек, жарроҳнинг тажрибасига боғлиқ. Гипоспадияни жарроҳлик даволаш усулларининг аксарияти асоратлардан холи эмас, шу сабабли операция усуллари яхши функционал ва косметик натижага эришиш учун мунтазам равишда қайта кўриб чиқилади ва зарур ўзгартиришлар киритилиб борилади.