Ўзбек халқ мифологик афсоналари

Аннотация

Диссертация мавзусининг долзарблиги ва зарурати. Жаҳон фольклоршунослигида мифологиянинг бадиий тафаккур тарихида тутган ўрни, мифик образлар генезиси ҳамда мифологик архетипларнинг халқ эпоси ва ёзма адабиёт поэтик контекстидаги функционал-семантик талқинларини аниқлашга алоҳида эътибор қаратилмоқда. Мифнинг халқ насри жанрлари тизимига таъсири ва бадиий матндаги поэтик функцияларини тадқиқ этиш орқали неомифологизм назариясининг асосланганлиги мифологик қарашларнинг миллий ўзига хослиги ва миф поэтикасини ўрганишни янада жадаллаштирди. Миф ва унинг халқ оғзаки ижодига диффузияланиши жараёнини ўрганиш натижасида олинган назарий умумлашмалар ўзбек фольклоридаги мифологик афсоналар генезиси ва образлар тизимини тадқиқ этишда ҳам муҳим аҳамият касб этади.