O‘QUVCHILARDA IJTIMOIY FAOL FUQAROLIK KOMPETENSIYASINI SHAKLLANTIRISHNING PEDAGOGIK TEXNOLOGIYALARI (Davlat va huquq asoslari o‘quv predmeti misolida)

Аннотация

Dissertatsiya mavzusining dolzarbligi va zarurati. Dunyo ta’lim tizimida yoshlarning hayoti mobaynida sifatli ta’lim olishlarini kafolatlovchi, ularning jamiyatda liderlik xususiyatlarini namoyish etishga hamda bilish jarayonlarini faollashtirishga qaratilgan texnologiyalardan kompleks foydalanishga alohida ahamiyat berilmoqda. Ta’lim muammolari bo‘yicha butunjahon Forumida qabul qilingan konsepsiyada «...Tahlil qilish, muammolarning yechimini topish hamda yuqori darajali kognitiv, shaxslararo va ijtimoiy ko‘nikmalarni...»1 rivojlantiruvchi o‘qitish muhitini yaratish ustuvor yo‘nalish sifatida belgilanganligi tahsil oluvchilarni har tomonlama rivojlangan, mustaqil fikrlay oladigan, ijodkor, ijtimoiy faol, aqlli va mantiqiy fikrlay oladigan hamda buyuk kelajak sari dadil qadam tashlay oladigan iqtidorli yoshlarni tarbiyalashda turli model va texnologiyalarni qo‘llash zaruriyatini yuzaga keltiradi.