TA’LIM KLASTERIDA TALABALARGA XORIJIY TIL O‘RGATISH MEXANIZMLARI

Аннотация

Dissertatsiya mavzusining dolzarbligi va zarurati. Jahon taʼlim tizimida xorijiy tilni o‘rgatishga klaster asosida pedagogik obyektlarni birlashtirishga oid metodologik yondashuvlarni chuqur nazariy tadqiq etish va shu asnoda til kompеtensiyasiga ega bo‘lgan, malakali mutaxassislar tayyorlash muammosini kompleks yechishga qaratilgan izlanishlar muhim ahamiyat kasb etmoqda. Oliy ta’lim tizimida til o‘rganish jarayonini rivojlantirish asosida ta’lim sifatini baholash bo‘yicha keng ko‘lamdagi tadqiqotlarni o‘tkazish tendensiyalari kuzatilmoqda. Jahonda ingliz tili o‘quv kurslarini o‘qitishda innovatsion texnologiyalar, interaktiv didaktik vositalar, fasilitatsion modellar, refleksiv texnologiyalardan foydalanish usullari va ularning samaradorligiga oid salmoqli ilmiy izlanishlar olib borilmoqda. Mazkur tadqiqotlarning asosiy vazifalari qatorida talabalarga klaster sharoitida ingliz tilini o‘rgatish mazmuni, kelgusidagi pedagogik faoliyatiga tayyorlash sifatini oshirish, ilmiy dunyoqarashini rivojlantirishga qaratilgan pedagogik yondashuvlarni o‘rganish va fan xususiyatlaridan kelib chiqib, o‘qitish uslublarini takomillashtirish masalalari muhim o‘rin egallaydi.