Бўйлама йўл-йўл нақшли пахта-ипакли трикотаж тўқималарини технологик кўрсаткичларини тадқиқи

Аннотация

Ҳозирги бозор иқтисодиёти шароитида трикотаж маҳсулотларига қўйиладиган талаблардан бири рақобатбардошлик бўлиб, у истеъмолчилик, функционал ва таннарх ҳаражатлари мажмуини назарда тутади. Енгил устки ва ички трикотаж маҳсулотларини ишлаб чиқаришда муваффақиятли қўлланилаётган трикотаж матолари орасида гигиеник хусусиятлари юқори бўлган, табиий ипак ипларини қўллаб матолар ишлаб чиқариш алоҳида қизиқиш уйғотмоқда. Сўнгги йилларда тўқимачилик ва тикув-трикотаж саноатини ривожлантириш, экспортни қўллаб-қувватлаш учун соҳада жадал ишлар амалга оширилмоқда. Мақолада маҳаллий хом ашёлардан самарали фойдаланиш мақсадида ишлаб чиқарилган пахта-ипакли нақшли трикотаж тўқима намуналарининг технологик кўрсаткичларини таҳлил натижалари келтирилган. Яратилган бўйлама йўл-йўл нақшли пахта-ипакли трикотаж тўқима намуналари Хитойнинг LongXing фирмасида ишлаб чиқарилган 14-класс икки игнадонли трикотаж тўқув машинасида тўқиб олинган. Хом ашё сифатида чизиқий зичлиги 20 тексли пахта, 14,3 тексли йигирилган ипак ва 8 тексли Лайкра ипларидан фойдаланилди. Олинган натижаларни амалиётга жорий этиш, ишлаб чиқарилаётган маҳсулотнинг рақобатбардошлигини оширади, маҳаллий хом ашёни қайта ишлаш улушини кўпайтиради, ички бозорни сифатли трикотаж маҳсулотлари билан тўлдириш ва маҳаллий ишлаб чиқарилган трикотаж маҳсулотларини ҳалқаро бозорга олиб чиқиш имконини беради.