Экологик хавфсиз сирт актив моддаларни қўллаган ҳолда туяқуш териларига ишлов беришдаги ёғсизлантириш жараёнини тадқиқ қилиш

Аннотация

Мақолада экзотик туяқуш чарми олиш технологиясини ишлаб чиқишдаги тадқиқот натижалари келтирилган. Тери хомашёсидан ёғ қолдиqларининг салбий таъсирини олдини олиш учун тери ости ёғ қатламини мездралаш вариантлари таклиф қилинган. Туяқуш тана терилари ўтказиш кенглиги L=1500 мм бўлган гидравлик, унинг оёқ ва қанот тери қисмлари ўтказиш кенглиги L=600 мм бўлган механик мездралаш машиналарида ишлов берилди. Мездралаш натижасида туяқуш тана тери қисмларининг оғирлиги 40-45 % га енгиллашди ва уларнинг юза ўлчами 20-25 % га ошди. Тери ости ёғ қатламини шилиш натижасида дерма структура элементларига кимёвий моддаларнинг диффузияси тезлашиши ва таъсир даражаси кўтарилиши кузатилди. Ивитиш ва ёғсизлантириш жараёнларини тезлаштириш ва сифатли ўтказиш мақсадида экологик хавфсиз, REACH европа регламенти талабларига жавоб берувчи САМ ювиш компазициялари қўлланилди. Ивитиш жараёни бўйича олиб борилган тадқиқотларда намланиш кўрсаткичи 67-68% ни ташкил қилиб, териларнинг бир текис намланиши кузатилди. Эмульсион ёғсизлантириш натижасида дермадаги табиий ёғ миқдори 0,5-1 % га камайиши аниқланди. Тери тўқимасидаги табиий ёғ миқдорини бундай камайтирилиши туяқуш териларига ишлов беришдаги кейинги жараёнларини сифатли ўтказиш имкониятини яратиб, тайёрланадиган чармнинг физик-механик хоссаларига ижобий таъсир кўрсатди. Технологик жараёнларда экологик хавфсиз REACH европа регламенти талабларига жавоб берувчи САМ ларнинг қўлланилиши атроф муҳитга етказиладиган техноген таъсир даражасини камайтириш имкониятини яратади.