Tут дарахти пўстлоғидан олинган толани физик-механик хоссаларини табиий толалар билан таққослаш

Аннотация

Ушбу мақолада тут дарахти пўстлоғидан олинган толанинг физикмеханик хоссалари аниқланиб, тўқимачилик саноатида ишлатиш имкониятлари ўрганилган. Тадқиқот ишлари ипак қуртини озуқаси сифатида фойдаланилган тут дарахти шохларида амалга оширилиб, ўртача ҳар бир шохда 37% барг бўлиши, барг озуқа сифатида ишлатилиб бўлингандан сўнг 63% шох-шабба чиқиши ва шохнинг пўстлоқ қисми эса ўрта ҳисобда 19,3% ни ташкил қилиши аниқланган. Тут дарахти пўстлоғидан олинган элементар тола узунлиги 10-40 mm ни, толанинг узилиш кучи 5-9 сN ни, узилишдаги чўзилиши 3-5 % ни ташкил этган. Толаларнинг чизиқий зичлиги эса умумий 0,12-0,18 teks ни ташкил этиб, тут дарахтининг йўғон шохларидан ажратиб олинган толанинг кўрсаткичларига нисбатан ингичка шохларидан ажратиб олинган элементар толанинг узунлиги 55,0% га, чизиқий зичлиги 18,7% га, толанинг узилиш кучи 48,2% га ва толанинг узилишдаги чўзилиши 54,4% га камайганлиги аниқланган. Тут шохларидан олинган луб толаси бошқа табиий толалар пахта, жун ва ипак толаси узунлиги, узилиш кучи, узилишгача чўзилиши, чизиқий зичлиги хоссалари билан таққосланган.