ТОШ ЎЙМАКОР САНЪАТИ

Аннотация

Тош ўймакор усталарнинг асосий иш материалидир. У мустаҳкам, узоққа чидайдиган ва чиройли бўлиши керак. Тошдан қурилган нарсалар бир қанча асрлар давомида яшамоқда. Уни қайта ишлаш ва ундан бирор нарса ясаш қийин, кишидан сабр-тоқат талаб қилади. Археологик топилмалар ва архитектура ёдгорликларини безашда қадимдан ишлатилиб кели-наётганлигининг далилидир. Тош ўймакорлигида ишлатиладиган тошлар ўрни, мақсади ҳамда вазифасига қараб юмшоқ, ўртача қаттиқликдаги ва қаттиқ бўлади. Юмшоқ тошларга — гипстош, талькохлорит, оҳактош ва бошқалар; ўртача қаттиқликдаги тошларга — оникс, порфир, оҳакли мармар ва қаттиқ тошларга эса — лазурит, амазон тоши, агат (халцедон), малахит, жадент, нефрит, яшма ва бошқалар киради. Бу материаллардан қозон, кўза, лаганлар ясалиб унга ажойиб ўйма нақшлар билан жило берилган.