Kesar kesishdan keyin ishlatiladigan kontrasepsiya vositalari va ularning immunitetga ta'siri (adabiyotlar tahlili)

Аннотация

Dunyoda kesar kesishning chastotasi juda o‘zgaruvchan bo‘lib, bugungi kunda "epidemiya masshtabiga" yetdi. Kesar kesishga tibbiy ehtiyoj umumiy tug‘ruqlarning 10-15 foizida uchraydi. Biroq, yangi tadqiqotlarga ko‘ra, asr boshlanishidan beri o‘tkazilgan operatsiyalar soni 2015 yil holatiga ko‘ra 12% dan 21% gacha ko‘tarildi [11,19]. O‘zbekistonda kesar kesish chastotasining ko‘payish tendensiyasi kuzatilmoqda. So‘nggi 10-15 yil ichida ushbu operatsiya chastotasi ikki baravar ko‘paydi va Respublika Ixtisoslashtirilgan Akusherlik va Ginekologiya Ilmiy Amaliy Tibbiyot markazi va Respublika Perinatal Markazi statistika bo‘limi bergan ma'lumotlarga ko‘ra, 2017 yilda bu ko‘rsatgich 18% ni tashkil etdi, ba'zi muassasalarda 35-40% ga ham yetadi [8]. Ammo kesar kesish to‘g‘risida qaror qabul qilganda, qarshi ko‘rsatmalarni hisobga olish lozim. Ma'lumki, abdominal tug‘ish paytida onalarda asoratlar xavfi 10 baravar yoki undan ko‘proq, hamda onalar o‘limi xavfi ikki baravar ko‘payadi [16].