Чингиз Айтматовнинг педагогик концепцияси ва унинг ёзувчи ижодида бадиий-публицистик ифодаланиши

Аннотация

Диссертация мавзусининг долзарблиги ва зарурати. Жаҳонда сўнгги йилларда илғор олий ўқув юртлари ва илмий марказлари1 педагогика фанларини ўрганиш ҳамда ривожлантириш, хусусан, бадиий адабиётнинг педагогик салоҳиятини ўрганиш ва ундан ёшларнинг таълим-тарбия жараёнини янада бойитиш мақсадида фойдаланиш борасида муҳим ишлар олиб бормоқда. Шу муносабат билан миллатларнинг маънавий раҳнамолари бўлган буюк файласуфлар, мутафаккирлар ва адибларнинг ёрқин педагогик қарашларига мурожаат қилиш асосида замонавий воқеликнинг маънавий манзараси ҳақидаги ёшларнинг яхлит қарашларини ривожлантириш долзарб аҳамият касб этади. Педагогикада бадиий адабиётнинг кенг қўлланиши, бадиий сўз усталарининг педагогик қарашларини теран англаш ёшларнинг эстетик ва ахлоқий тасаввурларини шакллантириш, ўқитувчи ва ўқувчи ўртасида маънавий мулоқотни мустахкамлаш, педагогнинг ўз издошига бўлган ижобий таъсирини кучайтириш ҳамда бўлажак ўқитувчиларнинг шахсий ва касбий маҳоратини ошириш учун зарурдир.