САМАРҚАНД ШАҲРИНИНГ УМУМБАШАРИЙ МАДАНИЙ ТАРАҚҚИЁТ ТАРИХИДА ТУТГАН ЎРНИ

Аннотация

Ушбу тўплам дунёнинг энг кўҳна ва бетакрор шаҳарларидан бири, ўзида бир неча минг йиллик тарих, юксак цивилизация намуналарини мужассам этган, инсониятнинг маданий тараққиётида алоҳида аҳамиятга эга бўлган Самарқанднинг 2750 йиллик юбилейи муносабати билан ўтказилаётган халқаро симпозиум материалларини ўз ичига олади. Тўпламда Зарафшон воҳасида ибтидоий маданиятнинг қарор топиши, деҳқончилик манзилларининг пайдо бўлиши, тарихий тараққиёт давомида маданиятларнинг алмашинуви каби илмий муаммолар ечимига кенг ўрин берилган. Ўрта Осиё халқларининг илк ёзма ёдгорлиги «Авесто»да қадимги Сўғд ҳақидаги маълумотлар, Самарқанднинг шаҳар сифатида шаклланиши, унинг Эрон аҳамонийлари ва Александр Македонский салтанати, эфталийлар, Турк ҳоқонлиги давлатлари таркибидаги тарихи, шаҳарнинг топонимикаси, манбашунослиги, сўғдийларнинг Буюк ипак йўлидаги фаолияти, илк ўрта асрлардаги диний толерантлик масалалари бирламчи манбалар ҳамда моддий маданият намуналари орқали ёритилган ва таҳлил қилинган. Бир қатор мақолалар Сўғдда ислом динининг ёйилиши, IX-XII асрларда шаҳарнинг Шарқ ренессансининг маркази сифатида ривожланиши, мўғуллар истилосидан кейинги инқироз, Амир Темур ва Темурийлар даври ренессанси масалалари янги археологик топилмалар, мавжуд меъморий обидалар мисолида ўрганишга бағишланган