QARAQALPAQ NAQIL-MAQALLARINDA HAYAL KONCEPTOSFERASÍ

Аннотация

Náreste dúnyaǵa kelgende onıń ata-anası yamasa jası úlken adam tárepinen balaǵa arnap jaqsı niyet penen at qoyıladı. Perzent ósip-ónip úlkeygende, orta jasta hám hátteki qartayǵanda da átirapındaǵı basqa adamlar tárepinen kóbinese sol ism menen shaqırıladı. Biraq, túrkiy xalıqlardıń kópshiliginde adamlardı óziniń arnawlı ismi menen ataw menen bir qatarda olarǵa húrmet-izzet, sıylasıq sezimlerin bildiriw maqsetinde basqa da sózlerden paydalanǵanlıǵın kóriwge boladı Musılman xalıqlarda ózinen jası úlken adamlar menen qarım-qatnasta bolǵanda olarǵa húrmet penen qarap ekinshi bir shıraylı atamalardı qollanǵan. Bul da xalıqlardıń ózine tán mádeniyatınıń bir belgisi sıpatında kózge taslanadı. Bunday atamalar tuwısqanlıq qarım-qatnaslardı bildiredi. Tuwısqanlıq atamalarınıń payda bolıw dáwiri uzaq dáwirlerge barıp taqaladı hám tarıyxıy rawajlanıw barısında mudamı ózgerip turadı. Tuwısqanlıq atamaları ayırım tillerde óz aldına arnawlı izertlengen bolsa, ayrım tillerde ulıwma kólemde qarastırılǵan yamasa ústirtin sóz etilgen.