Тритерпен кислоталарининг(глицирризин, глициррет) янги ҳосилалари синтези ва биологик фаоллиги

Аннотация

Дунёда ҳозирги кунда биологик фаол моддаларнинг синтези ва улар асосида тиббиётда вирусли касалликларини даволаш ҳамда профилактикаси, турли хил этиологияли иммунотанқисликлар учун янги дори воситаларини яратиш, қишлоқ хўжалик экинларини ҳимоя қилиш ва янги самарали биостимуляторлар яратиш муҳим вазифалардан бири ҳисобланади. Ҳозирда тиббиёт амалиётида ва қишлоқ хўжалик мақсадларида қўлланилувчи аксарият воситалар асосини биологик фаол моддаларнинг кимёвий модификация қилинган ҳосилалари ташкил қилмоқда. Замонавий органик, биоорганик кимё, фармакология, тиббиёт кимёси соҳаларининг ривожланиши турли касалликларга қарши қўлланилувчи, тирик организм генофондига зарари кам бўлган дори воситалари яратиш имконини бермоқда.