Қандли диабет 2 тури ва сурункали юрак етишмовчилигининг нозологик синтропияси патогенезининг клиник-гормонал ҳамда молекуляр-генетик жиҳатлари

Аннотация

Дунё бўйича қандли диабет 2-тури (ҚД2) муаммоларини ўрганишнинг долзарблиги унинг доимий равишда кўпайиб бориши билан боғлиқ. Сўнгги 20 йил ичида дунёда диабет 2-турига чалинган беморлар сони 6 баробар ошди. IDF маълумотларига кўра, 2021- йилда 537 миллион кишида ҚД2 қайд этилди. Яширин диабет билан одамлар энг кўп Африка, Ғарбий тинч океани минтақаси ва Жануби-Шарқий Осиё мамлакатларида топилди. 2021-йилда деярли 6,7 миллион ўлим диабет билан боғлиқ бўлди. Ўзбекистон Республикасида 2020-йилда вилоят эндокринологик диспансерлари ва эндокринология маркази филиаллари маълумотларига кўра, 277,926 нафар ҚД билан касалланган беморлар рўйхатга олинган. Қайд этиш керакки, ҚД беморларининг ҳақиқий сони рўйхатга олинганлардан 10 мартага ошади, сўнгги 18 йил давомида эса республикада ҚД билан хасталанган беморларининг сони 2,4 мартага кўпайди.