Маҳаллий хомашёлар асосида полимерли антикоррозион қопламаларни яратиш ва тадқиқ этиш

Аннотация

Ҳозирги вақтда жаҳонда саноати жадал ривожланаётган мамлакатлар иқтисодиётининг турли соҳаларида металлар коррозиясининг олдини олиш ва коррозияга қарши қопламаларни яратиш долзарб вазифалардан бири ҳисобланади. Дунёда кимё ва нефт-кимё саноати ривожланган мамлакатларда металларнинг коррозияси натижасида етказилган зарар йиллик металларнинг ишлаб чиқариш ҳажмининг 30 фоизини ташкил қилади, шунинг учун коррозияга қарши қопламаларни яратиш ва амалда қўллаш катта аҳамиятга эга.Бугунги кунда дунёда коррозион муҳитда ишлайдиган технологик ускуналар ва қувурларни коррозиядан ҳимоя қилишда уларни ингибиторлар ёрдамида ҳимоялаш ва чидамлилигини оширишга катта эътибор қаратилмоқда. Шунга кўра, кимёвий бирикмалар ва композицияларга қўшимчалар сифатида хизмат қиладиган коррозияга чидамли қопламалар яратиш, қувур линиялари ва бошқа саноат ускуналарини, сув таъминоти тармоқларини, нефтни қайта ишлаш ва нефт-кимё саноатини, ҳар қандай электр станцияларини, шунингдек, қурилиш материалларини ҳимоя қилиш учун коррозияга қарши қопламаларнинг янги турларини яратиш бўйича тизимли илмий тадқиқотлар олиб борилмоқда. Қувурларга қўйиладиган қатъий талаблар сабабли кам заҳарли ёки зарарсиз иккиламчи саноат маҳсулотларини антикоррозион қопламалар сифатида ишлатиш ҳозирги кунда долзарб ҳисобланади.