Олий таълим ва илмий-тадқиқот муассасалари илмий салоҳиятини мониторинг қилиш усул ва моделларини яратиш

Аннотация

Диссертация мавзусининг долзарблиги ва зарурати. Бугунги кунда жаҳонда технологиялар ва ахборотлаштириш жараёнларининг жадал ривожланиши шароитида олий таълим муассасалари ҳамда илмий тадқиқот марказлари илмий салоҳиятини баҳолашга, ахборот-коммуникация технологиялари орқали мониторинг ахборот тизимларини ишлаб чиқишга ҳамда маълумотлар базасини шакллантиришга йўналтирилган мақсадли илмий тадқиқотларни амалга оширишга алоҳида эътибор қаратилмоқда. Дунёда илмий салоҳиятни баҳолаш усуллари, башоратлаш масалалари ва маълумотларни интеллектуал таҳлиллаш масалаларини ечиш усул ва алгоритмларини тадқиқ қилиш муҳим ва долзарб аҳамият касб этмоқда. Шу жиҳатдан ушбу соҳада, жумладан олий таълим муассасалари илмий фаолияти ва ўқув жараёни мониторингини юритишда ахборот IDEF-моделлари, реляцион алгебра асосида мониторинг кўрсаткичларининг реляцион ҳисоблашларини бажарувчи алгоритмларни такомиллаштириш, илмий салоҳиятни баҳолаш маълумотларини шакллантириш, йиғиш ва ишлов беришга йўналтирилган маълумотлар базасининг ахборот моделларини яратиш, илмий фаолият бўйича қарор қабул қилишга кўмаклашиш ва назоратини ташкил этиш дастурий воситалар мажмуини такомиллаштириш муҳим вазифалардан бири ҳисобланади.