Болаларда камқонлик касаллиги тарқалганлиги, хавф омиллари ва уларни олдини олиш

Аннотация

Камқонлик дунёда энг кўп тарқалган патологиядир. Камқонлик деб қоннинг бир ҳажмида эритроцитлар миқдорининг ва гемоглобин даражасининг пасайиши билан характерланадиган клиник-гематологик синдромга айтилади. Жаҳон соғлиқни сақлаш ташкилоти (ЖССТ) экспертлари фикрига кўра, жамоат саломатлигини сақлаш нуқтаи назаридан популяцияда камқонлик тарқалганлигини баҳолаш 3 гуруҳга бўлиб ўрганилади: кучсиз – 5% дан 19, 9% гача, ўртача – 20% дан 39,9% гача, юқори – 40% ва ундан кўп. Камқонликни аҳоли орасида тарқалганлиги 40% дан кўп бўлганда муаммо нафақат тиббий, балки ижтимоий-иқтисодий аҳамият касб этиб, давлат даражасида тадбирлар қабул қилинишини тақозо этади. Жаҳонда, ЖССТ маълумотларига кўра 1993-2005 йилларда, анемия билан 1,62 миллиард киши хасталанган.