Akademik litsey va umumiy o‘rta maktablarda abdulla oripov ijodini o‘qitishda interfaol metodlar qo‘llanishi

Аннотация

Abdulla Oripov she’rlari birinchi galda shoirning o‘zi uchun eng ardoqli, dil qa’ridan sizib chiqqan shaxsiy kechinma-tuyg‘ular hosilasidir. Ayni paytda ana shu shaxsiy kechinmalar ko‘pchilik uchun ham qadrli va tushunarlidir. Abdulla Oripov she’rlari qog‘ozda qolib ketadigan satrlar emas, ular tillardan dillarga ko‘chib, muqim joy olgan yetuk she’riyatdir. Darhaqiqat, o‘zbek xalqi azal-azaldan badiiy adabiyotdan o‘ziga ma’naviy ozuqa olgan, ma’naviy hordiq chiqargan. Adabiy ta’lim asosini adabiyot o‘qitishning maqsad va vazifalari hamda uning mazmuni tushunchalari tashkil etadi. Komil shaxsni shakllantirish adabiyot o‘qitishning bosh maqsadi. Bu umumiy tushuncha bo‘lib, istiqbolni belgilaydi. Oddiy o‘quvchidan kitobxon o‘quvchini tayyorlash, bolalarni badiiy so‘zdan ta’sirlanadigan, uning josibasini his etadigan, haqiqiy badiiy asarni taniydigan, o‘qigan badiiy asarini tahlil eta biladigan va undan o‘ziga xulosa chiqarishga qobil, o‘z qarashlarini og‘zaki va yozma ravon ifoda eta oladigan, badiiy asar o‘qishni o‘zining birinchi hayotiy ehtiyojiga aylantirgan o‘quvchi shaxsini shakllantirish bosh vazifa sifatida turadi. Biz shundan kelib chiqqan holda, magistrlik dissertatsiyamizda ” Akademik litsey va umumiy o‘rta maktablarda Abdulla Oripov ijodini o‘qitishda interfaol metodlar qo‘llanishi”ning o‘ziga xos usullarini tahlil qilishga harakat qilamiz.