Гравитацион майдонларда оптимал траекторияларни топишнинг аналитик усуллари

Аннотация

Диссертация ишининг долзарблиги ва зарурати. Жаҳон миқёсида олиб борилаётган кўплаб илмий-амалий тадқиқотлар, аксарият ҳолларда, гравитацион майдонда ҳаракат қилувчи космик аппарат масса марказининг оптимал траекторияларини ҳисоблаш масалаларига келтирилади. Вариацион масала дифференциал тенгламаларининг аналитик ечимларини топиш, чекли масса сарфи билан ҳаракатланувчи нуқтанинг оптимал траекторияларни қуриш ва бошқариш параметрларини аниқлаш муҳим аҳамиятга эга ҳисобланади. Шунинг учун сонли ҳисобларсиз узоқ вақт оралиқлари учун ҳаракатни прогнозлаш, мураккаб ҳисобларни амалга оширмай космик аппарат орбитасини олдиндан берилган хоссаларига кўра бошланғич шартларни танлаш имконини берадиган, тежамкор ҳамда қулай бўлган содда аналитик назарияни қуриш осмон механикасида муҳим аҳамиятга эга.