Трубопроводларда эластик ёпишқоқ суюқликларнинг ностационар ва пульсацияли оқимлари

Аннотация

Диссертация мавзусининг долзарблиги ва зарурати. Жаҳонда суюқликлар ва газлардан унумли фойдаланиш, жумладан, иқтисодиётнинг нефть соҳасида (нефть ва нефть маҳсулотларини қувурларда узатиш), кимё, озиқ-овқат соҳаларида (транспортёрлар, пневматик конвейерларга тааллуқли масалаларни қарашда), тўқимачилик ва пахта тозалаш саноатларида (пахта хомашёсини тозалашда, технологик ускуналарни лойиҳалаш ва ишончлилигини таҳлил этишда, синтетик материалларни олишда), гидротехникада (қувурларни қуйқалардан тозалашда, қаттиқ заррачаларни узатишда) муҳим масалалардан бири бўлиб келмоқда. Шу жихатдан суюқликлар ва газларнинг ностационар ва пульсацияли оқимларидаги муайян шароитларда тебраниш ёки пульсация ёрдамида эритиш, қуритиш, тозалаш ва бошқа жараёнларини тезлаштириш ва яхшилаш имкони мавжудлигига алоҳида эътибор қаратилмоқда. Бу борада, жумладан, АҚШ, Буюк Британия, Нидерландия, Германия, Бельгия, Хитой, Жанубий Корея, Россия, Ўзбекистон ва бошқа ривожланган мамлакатларда суюқликлар ва газларнинг конвектив кўчиш жараёнларини назарий ҳамда амалий жиҳатдан тадқиқ қилиш алоҳида аҳамиятга эга.