Товон-кафт куйишлари ва уларнинг оқибатлари бор беморларда тиббий реабилитация

Аннотация

Диссертация мавзусининг долзарблиги ва зарурати. Куйиш жароҳати – соғлиқни сақлашнинг глобал ижтимоий муаммоси бўлиб, унинг оқибатида ҳар йили 180000 киши вафот этади. «Куйишлар ногиронликнинг етакчи сабабчиси ҳисобланади». Куйиш жароҳатлари таркибида товон-кафт куйишларига алоҳида аҳамият қаратилади. Узоқ муддатли меҳнатга лаёқатсизлик ва даволаниш, асоратлар ҳажмининг кўплиги инсон учун юқори молиявий харажатлар ва ҳиссий ўнғайсизлик келтиради. Товон-кафт ва тўпиқнинг чуқур куйиши мавжуд беморлар реабилитацияга муҳтож бўлади, чунки «бундай куйишлар ногиронликнинг катта фоизини келтириб чиқаради, 26,6-47,7% беморлар жарроҳлик аралашувига дучор бўлади, улардан 20 фоизи болалардир». Оёқлар тана умумий юзасининг камроқ қисмини эгалласа-да, бу жойдаги куйишлар узоқ вақт ётоқ режими, касалхонага ётқизиш ҳамда эрта ва кечки асоратлар хавфи туфайли кундалик ҳаётда жиддий оқибатларга олиб келиши мумкин. Оёқнинг чуқур куйишини даволашнинг замонавий концепцияси терининг яхлитлигини тезда тиклашга хамда беморларнинг ҳаёт сифатини яхшилашга ёрдам берадиган эрта жарроҳлик даволаш усули ҳисобланади. Бироқ, ҳозирги вақтда қўлланиладиган анъанавий даволаш усуллари кўпинча рецидивга олиб келади, шунинг учун оёқнинг чуқур куйиши туфайли ногиронлар сонининг кўпайиши мураккаб ижтимоий-иқтисодий муаммо бўлиб, реабилитация усулларини ташкил этишни такомиллаштириш бўйича қатор вазифаларни илгари суради