NANOKIMYO TARAQQIYOTI VA UNING ISTIQBOLLARI

Аннотация

Ushbu tadqiqotning asosiy maqsadi – jadal rivojlanib borayotgan nanotexnologiyalar doirasida nanokimyo fanining nazariy asoslari va amaliy qo‘llanilish yo‘nalishlari bilan tanishtirishdan iborat. Nanokimyo – bu kimyo, fizika, materialshunoslik va muhandislik fanlarining kesishgan nuqtasida shakllangan zamonaviy yo‘nalish bo‘lib, u moddalarning nanoo‘lchamdagi xossalari va ular bilan bog‘liq reaksiyalarni o‘rganadi. Nanomateriallar – bu o‘ziga xos fizik-kimyoviy xususiyatlarga ega bo‘lgan, 1–100 nanometr oralig‘idagi zarrachalardan tashkil topgan moddalardir. Nanozarrachalar katta sirt maydoni, kvant o‘lcham effektlari va yuqori faollik tufayli an’anaviy moddalarga nisbatan mutlaqo yangi fazilatlarga ega bo‘ladi. Ular zamonaviy texnologiyalarda – elektronika, tibbiyot, ekologiya, energetika, qishloq xo‘jaligi va boshqa ko‘plab sohalarda keng qo‘llanilmoqda. Bugungi ilm-fan texnik qurilmalarni miniaturalashtirish sari intilmoqda. Tadqiqotlar shuni ko‘rsatdiki, elektron qurilmalarda ishlatiladigan materiallar nanozarracha shaklida butunlay yangicha xatti-harakat va funksional imkoniyatlarga ega bo‘ladi. Masalan, yuqori o‘tkazuvchanlik, sirt faolligi, optik sezuvchanlik kabi xususiyatlar faqat nanomiqyosda namoyon bo‘ladi. Xulosa qilib aytganda, nanokimyo – bu XXI asr fanining eng istiqbolli yo‘nalishlaridan biri bo‘lib, u yordamida yuqori samarali, ekologik xavfsiz va innovatsion mahsulotlar yaratish imkoniyati yuzaga kelmoqda.