Zamonaviy o’zbek adabiyotida Imom Buxoriy timsoli

Аннотация

Yangi o’zbek adabiyoti sahifalari nazardan o’tkazilsa, she’riy dramalarning katta qismitarixiy mavzuda yozilganligi kuzatiladi. Bu jarayon, aytish mumkinki, Oybekning “Mahmud Torobiy”, H.Olimjonning “Muqanna” asarlaridan boshlangan. Ushbu adabiy an’ana istiqlol yillarida ham davom ettirildi. Jumladan, she’riy dramaning “Sohibqiron” (A. Oripov), “Imom Buxoriy” (U.Qo’chqor), “Samarqand sayqali” (Iqbol Mirzo) badiiy yuksak namunalari dunyo yuzini ko’rdi.Usmon Qo’chqorning “Imom Buxoriy” asarida ulug’ mutasavvuf Imom al-Buxoriy siymosi yaratilgan. Unda allomaning ayni yetuklik pallasi qalamga olinib, uning Nishopurdan Buxoroga qaytishi voqealari, ona yurtidagi hayoti lavhalari falsafiy-psixologik yondashuv asosida aks ettirilgan. Asarda Islom dinini mayoq qilib olgan, lekin dindan mutlaqo bexabar, jaholat botqog`iga botgan bir guruh qalandarlar obrazi Imom Buxoriyga, din va ma’rifat ahliga qarama-qarshi qo`yiladi. Maqolada mazkur asar sujeti, kompozitsiyasi, obrazlar tizimi nuqtai nazaridan tahlil etilgan va shu asosda she’riy dramaga xos xususiyatlar ochib berilgan.