Ўзбекистон таълим тизимида хорижий тиллар: тарих ва тажрибалар

Аннотация

Дунё миқёсида глобаллашув тенденциясининг авж олиши ва халқаро даражада давлатларнинг сиёсий ва иқтисодий интеграцияси мураккаб, зиддиятли жараён сифатида кутилмаганда салбий хусусиятлар ҳам намоён этаётгани сир эмас. Бундай тадрижийлик шароитида ер юзида яшаётган 5 мингдан ортиқ миллат ва элатларнинг феноменини сақлашга эҳтиёж пайдо бўлади. ЮНЕСКО ҳисоб-китобларига кўра, дунё бўйича 7 мингга яқин тил мавжуд. Британия замонавий тилларни ўрганиш институти (Institute of modern languages research) илмий ходимлари тадқиқотларига кўра, глобализация ва миграция натижасида яқин юз йил ичида инсоният ушбу тилларнинг ярмидан маҳрум бўлади. Ҳар ойда 2 та тил ўлик тилга айланмоқда , натижада, миллий давлатчилик пойдеворини заифлаштирувчи омиллар, яъни тили, тарихи ва маданиятини йўқотиб бораётган халқлар сони кун сайин кўпаймоқда.