Органик бирикмалар сиртий ионлашув чегаравий соҳаси қонуниятлари ва улар юзага келишининг детекторлар тезкорлигига боғлиқлиги

Аннотация

Диссертация мавзусининг долзарблиги ва зарурати. Жаҳонда экология, суд тиббиёти, наркология ва токсикологиянинг кўпгина амалий муаммолари газ аралашмалари, атроф-муҳит объектлари, озиқ-овқат маҳсулотлари ва биотиббиёт намуналаридаги айрим моддаларнинг қолдиқ изи миқдорини аниқлаш ва таҳлил қилиш билан боғлиқ. Ҳозирги кунда ушбу муаммоларни ҳал қилишда масс-спектрометрия, хроматография, хроматомасс-спектрометрия, юпқа қатламли хромато-мaсс-спектрометрия каби юқори технологияли усуллардан ҳамда иқтисодий жиҳатдан самарали бўлган органик моддаларнинг айрим синфларига нисбатан юқори селективликка эга физик-кимёвий усулларидан фойдаланилмоқда. Бу борада азот асосли органик бирикмалар молекулаларига юқори селективлик ва сезгирлигига эга бўлган, турли хил газ фазали муҳитларда ушбу моддалар синфларини аниқлаш ва таҳлил қилиш имконини берадиган, шунингдек, тезкорлиги ва портативлиги билан аналитик кимё амалиётида ўз ўрнига эга бўлган сиртий ионлашув (СИ)ҳодисаси асосидаги физик-кимёвий таҳлил қилиш усуллари ва қурилмаларига алоҳида эътибор берилмоқда