Суюқлик билан алоқада бўлган эгри чизиқли қувурларнинг чизиқли тебраниш хусусиятлари

Аннотация

Жаҳонда техника ва ишлаб-чиқариш машиналарида учрайдиган жуда кўп конструкция элементлари эгри чизиқли фазовий стержен (ёки қувур)лардан ташкил топган бўлиб, бундай стерженлар турли муҳитлар билан ўзаро таъсирлашганда уларнинг динамик ҳолатини тадқиқ этиш муҳим масалалардан бири ҳисобланади. Шу жиҳатдан, суюқлик билан ўзаро таъсирда бўлган эгри қувурларнинг хусусий ва мажбурий тебранишлари масалаларини ўрганиш, замонавий қурилиш иншоотлари, самолётсозлик, кемасозлик ва машинасозлик қурилмаларида ҳар қандай динамик таъсирлар натижасида вужудга келадиган резонанс ҳолатларини ниҳоятда аниқ тасаввур қилишни талаб қилади. Бу борада кўпгина хорижий давлатларида, жумладан АҚШ, Канада, Россия ва бошқа давлатларда ҳаракатланувчи транспортдаги вибрация ва шовқинга қарши курашиш муаммосини ўрганишга, эгри стерженлар масалаларини тадқиқ қилишга алоҳида эътибор қаратилмоқда.