Муқобил энергия манбалари асосида комбинациялашган “чорвачиликгелиоиссиқҳона комплекси”нинг энергия самарадорлигини ошириш

Аннотация

Диссертация мавзусининг долзарблиги ва зарурати. Жаҳонда чорвачилик бинолари ва иссиқхоналарда микроиқлимни таъминлаш учун фойдаланиладиган технология ва тизимлар катта миқдорда ёқилғи-энергия ресурслари сарфини талаб этади. Чорвачилик биноларидан ҳар йили атрофмуҳитга 166 млрд м3 сув буғлари, 39 млрд м3 карбонат ангидрид, 1,8 млрд м3 аммиак, 700 минг м3 олтингугурт водороди тарқалади. Ушбу зарарли газларни атроф-муҳитга чиқариб ташлаш учун вентиляцияга 2 млрд кВт*соат, қўшимча иситишга 1,8 млрд кВт*соат электр энергияси, 0,6 млн. м3 табиий газ, 1,3 млн. тонна суюқ ва 1,7 млн. тонна қаттиқ ёқилғи сарф қилинади. Кескин континентал иқлим шароитидаги мамлакатларда 1 гектар майдонли иссиқхонани иситиш учун йилига 200 тоннагача шартли ёқилғи сарфланади. Шу сабабли, чорвачилик иншоотларида зарур бўлган микроиқлим ва иссиқхоналар учун талаб этиладиган ҳарорат-намлик режимларининг оптимал вариантларини яратишда муқобил энергия манбалари асосида ишлайдиган комбинациялашган чорвачилик гелиоиссиқхона комплексларини ишлаб чиқиш муҳим аҳамиятга эга ҳисобланади