O‘PKANING SURUNKALI OBSTRUKTIV KASALLIGI VA YURAK ISHEMIK KASALLIGI KOMORBIDLIGIDA KREATININ VA SISTATIN C KO‘RSATKICHLARINING SOLISHTIRMA TAHLILI

Аннотация

O‘pkaning surunkali obstruktiv kasalligi (OSOK) va yurak ishemik kasalligi (YIK) ko‘p hollarda birga uchraydigan va bir-birining kechishiga salbiy ta’sir ko‘rsatadigan patologiyalardir. Bu kasalliklarning kombinatsiyasi buyrak disfunktsiyasining rivojlanish xavfini sezilarli darajada oshiradi. Kreatinin an’anaviy marker sifatida qo‘llanilsa-da, sistatin C yangi va ishonchli biomarker sifatida tobora ko‘proq e’tiborni tortmoqda. Ushbu tadqiqotning maqsadi OSOK va YIK bilan og‘rigan bemorlarda kreatinin va sistatin C ko‘rsatkichlarining diagnostik ahamiyatini solishtirma baholashdan iborat. Toshkent davlat tibbiyot universitetining 2-sonli oilaviy tibbiyot kafedrasida 2023-2024 yillarda olib borilgan kesimli kuzatuv tadqiqotiga OSOK (GOLD mezonlari bo‘yicha) va YIK (ESC ko‘rsatmalari bo‘yicha) tashxisli 90 nafar bemor va 30 nafar sog‘lom nazorat guruhi jalb qilingan. Bemorlarning barchasida Kreatinin (Jaffe usuli), Sistatin C (immunoturbidimetrik usul) eGFR (CKD-EPI formulasi bo‘yicha), Spirometriya (FEV1/FVC) va Transtorakal exokardiyografiya tekshiruvlar o‘tkazilgan. Statistik tahlil SPSS 25.0 dasturida ANOVA, Pearson korrelyatsiyasi va regressiya tahlillari yordamida amalga oshirilgan.