ЎЗБЕК АДАБИЙ ТИЛИДА ЎЗЛАШТИРМАЛИК ВА МАТН

Аннотация

Жаҳон фанида XX асрнинг биринчи ярми охирларида гапнинг лисоний-нутқий хусусияти билан бир қаторда гапдан йирик бирлик, мураккаб синтактик бутунлик, гаплар ҳамкорлиги, бирлиги ҳам тадқиқ этила бошлади ва кейинчалик рус тилида текст, немис тилида text, инглиз ва француз тилларида discourse, discour, яъни матн деб номланган бундай бирлик алоҳида тадқиқотлар учун манба бўлиб келмоқда. Ҳозирда жаҳон тилшунослигида ўзлаштирмалик тадқиқига матн лингвистикаси ва матн грамматикаси асосида ёндашувларнинг ривожланиши ҳам шу омил билан боғлиқ. Ўзлаштирма хабар, ўзлаштирма буйруқ ва ўзлаш-тирма сўроқнинг коммуникатив мақсад категорияси воситалари орасида тутган ўрнини белгилашга алоҳида эътибор қаратилмоқда.