Ўзбекистон Республикасининг БМТ глобал дастурларидаги иштироки тарихи

Аннотация

Жаҳонда глобаллашув жараёнлари тобора авж олиб, замонавий илм-фан, инновацион технологиялар, ахборот ва фикрлар хилма-хиллиги ривожланиб бормоқда. Шу билан бирга, дунё ва инсоният тараққиёти йўлида янги глобал муаммолар юзага келмоқда. Бирлашган Миллатлар Ташкилоти (БМТ) ташаббуси билан халқаро миқёсда ўзаро ҳамкорликда ҳал этишни талаб қиладиган турли муаммолар юзасидан Минг йиллик ривожланиш мақсадлари (МРМ) ва Барқарор ривожланиш мақсадлари (БРМ) глобал дастурлари илгари сурилди. Мазкур дастурларда бутун инсоният тақдирига дахлдор муаммоларни миллий ва халқаро даражада ҳал этиш вазифалари қўйилди. Шу жиҳатдан ушбу мақсад ва вазифаларда илгари сурилган ғояларни, уларни амалга ошириш борасида жаҳон тажрибасини таҳлил қилиш, мавжуд муаммоларни аниқлашга қаратилган таклиф ва тавсиялар бериш долзарб аҳамиятга эга масалалардан биридир.