Умумий ўрта таълим мактабларида Бухоро болалар фольклор қўшиқларини ўргатишнинг илмий-методик имкониятларини такомиллаштириш (1-4-синфлар мисолида)

Аннотация

Диссертация мавзусининг долзарблиги ва зарурати. Жаҳон cанъатшунослигида Шарқ мусиқаси алоҳида саҳифани ташкил этади. Бу тизимда эса Бухоро мусиқий санъати мероси урф-одатлари, кўп асрлик тарих ва миллий қадриятга эга. Замонавий педагогика илмида шу санъатни миллий қадриятлар билан боғлиқ ҳолда ўрганиш долзарблик касб этади. Ўзбек мусиқасининг қадриятларимизга уйғун ҳолда ривожланиши учун кенг имкониятлар яратилиб, ўзбек санъати, жумладан, Бухоро мусиқа мероси халқимизнинг урф-одатлари кўп асрлик анъаналари руҳида ривожланмоқда. Бухоро болалар фольклор қўшиқларини ва унда ўзбек миллати фазилатларини ифода этувчи жиҳатларнинг педагогик нуқтаи-назардан ўрганиш фан олдида турган муҳим вазифалардан биридир. Ёш авлоднинг мусиқий истеъдоди ва маданиятини юксалтириш мақсадида мамлакатимизнинг ҳар бир шаҳар ва туманида мусиқа ва санъат мактабларининг фаолият кўрсатиши болаларнинг миллий қадриятларимизга, жумладан, ўтмишдан миллий мерос бўлиб келаѐтган фольклор қўшиқларига тўғри муносабатни шакллантиришни назарда тутади.