Қоракўл қўйларини самарали селекциялашнинг экологик ва генетик асослари

Аннотация

Диссертация мавзусининг долзарблиги ва зарурати. Ҳозирги кунда қоракўл қўйлари эволюцион жиҳатдан шаклланганлик, экологик жиҳатдан чўл шароитига мослашганлик, ирсий жиҳатдан мустаҳкамланганлик, турли ранг, рангбаранглик, гул хусусиятлари билан характерланувчи қимматли генофонд ҳисобланиб, дунёнинг 40 дан ортиқ мамлакатларида муваффақиятли урчитилади. Ушбу давлатлардан энг йириклари Афғонистон, Жанубий Африка республикаси, Намибия, Эрон бўлиб, Жанубий Африка республикаси ва Намибияда селекция-наслчилик ишларини юритиш яхши илмий асосга эга. Ушбу давлатларда қўйларнинг ирсияти мустаҳкамланган ва етиштирилган қоракўл териларининг 70-80 фоизи бир хил муар расмли маҳсулот ҳисобланиб, уларда етиштириладиган қоракўл териларининг ассортименти унчалик кенг бўлмасада, сифатининг юқорилиги ҳисобига дунё бозорларида қиммат баҳоларда сотилади.