Электр энергетика тизимининг ҳолатларини дастлабки маълумотлар эҳтимолли ва қисман ноаниқ бўлган шароитларда оптималлаш

Аннотация

Диссертация мавзусининг долзарблиги ва зарурати. Жаҳонда энергетика соҳасининг долзарб вазифаларидан бири сифатида электр энергиясини ишлаб чиқариш, узатиш ва тақсимлаш жараёнида тизимнинг энергия ресурслари истеъмолини камайтиришга олиб келувчи иш режимларини аниқлашга алоҳида аҳамият берилмоқда. Ҳозирги кунда ривожланган мамлакатларда «энергетика тизимларининг режимларини дастлабки маълумотларнинг ноаниқлигини эътиборга олиб оптималлаш натижасида иқтисодий харажатларни 1,6% гача камайтириш мумкинлиги аниқланган»1. Бу борада, жумладан энергетика тизимларининг режимларини оптимал режалаштириш масалаларида, дастлабки маълумотлар сифатида баъзи бир хатоликларга эга бўлган усуллар билан башорат қилиш асосида аниқланган схемаларининг ҳисобланган катталиклари ва электр энергиясини истеъмол қилиш тугунларининг юкламасидан фойдаланишга алоҳида эътибор қаратилмоқда.