Мослашувчан суперконденсаторлар учун икки тармоқли гел полимер электролитлар олиш технологияси»

Аннотация

Диссертация мавзусининг долзарблиги ва зарурати. Жаҳонда электр энергияси инсоният тараққиёти ва иқтисодиётининг ўсиши учун муҳим омил бўлиб, уни сақлаш ва ундан оқилона фойдаланиш долзарб муаммолардан бири ҳисобланади. Бугунги кунда халқ хўжалигида ва саноат электроникасида, шу жумладан транспорт соҳаларида электр энергияси манбалари сифатида аккумуляторлардан кенг фойдаланиб келинмоқда. Электр манбалари сифатида автомобил саноатида ва электротранспортда аккумуляторларга нисбатан юқори механик хоссаларга ва самарадорликка эга бўлган суперконденсаторларни яратиш, катта энергия зичлиги ва қувватига эга бўлган энергия сақловчи манбаларни электр хусусиятларини ошириш бўйича тадқиқот ишларини олиб бориш ва олинган натижалар асосида илмий ва амалий янгиликларга эришиш муҳим аҳамиятга эга.