Инфокоммуникацион тизимларда ахборот ҳимояланганлигини оширишнинг усул ва воситаларини такомиллаштириш

Аннотация

Диссертация мавзусининг долзарблиги ва зарурати. Жаҳонда инфокоммуникацион тизимларда ахборотдан рухсатсиз фойдаланишни аниқлаш ва бартараф этиш, тизимларнинг ҳимояланганлигини баҳолаш ва рухсатсиз фойдаланишдан ҳимоялаш воситаларини яратиш ҳамда такомиллаштиришга алоҳида эътибор қаратилмоқда. Рақамли иқтисодиётда ахборот технологияларини қўллаш орқали барча соҳаларнинг самарадорлиги ошиб бормоқда. Бу эса ахборотнинг ҳимояланганлик масаласида муайян хавф- хатарларни келтириб чиқаради. 2020 йилнинг биринчи чорагида киберинцидентлар сони тез суръатлар билан ошиб борди ва бунинг натижасида ахборот тизимларга бўладиган ҳужумлар сони 2019 йилга нисбатан 22,5% га ошганини яққол кўриш мумкин. Шунингдек жорий йилнинг ўзида мақсадли ҳужумлар сони 67% фоизни ташкил этди1. Бу борада хорижий мамлакатларда, жумладан, АҚШ, Нидерландия, Германия, Буюк Британия, Франция, Италия, Россия Федерацияси ва бошқа давлатларда инфокоммуникацион тизимларининг ҳимояланганлигини таъминловчи ахборотдан рухсатсиз фойдаланишни ҳимоялашнинг дастурий-аппарат воситаларини ишлаб чиқиш муҳим аҳамият касб этмоқда.