Атмосферада зарарли моддаларнинг кўчиши ва диффузияси жараёнларини башоратлаш учун моделлар, алгоритмлар ва дастурлар мажмуи

Аннотация

Диссертация мавзусининг долзарблиги ва зарурати. Жаҳонда атроф-муҳитни муҳофаза қилишга доир қарорлар қабул қилишга кўмаклашувчи ва уни антропоген таъсирдан ҳимоя қилишга йўналтирилган математик моделлар, самарали сонли алгоритмлар ҳамда дастурий таъминотларни ишлаб чиқишга катта эътибор берилмоқда. Жумладан, атмосферанинг чегаравий қатламида зарарли моддаларнинг тарқалиш жараёнини кузатиш ва башоратлаш алоҳида назарий ва амалий қизиқиш уйғотмоқда. Атмосферада ифлослантирувчи моддалар концентрациясининг тарқалишини тезкор кузатиш ва баҳолаш учун математик моделлар, ҳисоблаш алгоритмлари ва дастурий воситаларни ишлаб чиқиш муаммоси айниқса АҚШ, Канада, Буюк Британия, Европа Иттифоқи мамлакатлари, Россия Федерацияси, Ҳиндистон ва Хитой каби саноати ривожланган мамлакатларда долзарблик касб этмоқда.