Мустақиллик шароитида ўзбек миллий менталитетида этномаданий жараёнлар (ижтимоий-фалсафий таҳлил)

Аннотация

Этномаданият ҳар доим ҳам долзарб мавзу бўлиб келган. Чунки, у ижтимоий тараққиётнинг муҳим омили, миллат мавжудлигининг маънавий асоси, унинг бугунги ва истиқболини таъминлайдиган бебаҳо бойлик ҳисобланади. Мустамлака ва қарамлик азобларини ўз бошидан кечирган, этномаданияти топталган халқимиз учун уни ҳар томонлама ўрганиш, ҳали юзага чиқмаган имкониятларини очиш, тарих бунёдкори, яратувчан халқ айниқса, ёшларимиз онги ва қалбига сингдириш ниҳоятда долзарб вазифадир. Миллий тикланиш жараёни кетаётган бугунги кунда унинг илмий жиҳатдан долзарблиги яна ҳам ошиб бормоқда. Мамлакагимиз ўз мустақиллигини қўлга киритгандан кейингина миллатимизнинг ана шундай мустабид йилларида топталган этномаданият салоҳиятини қайта тиклаш, миллий менталитет ва уни янада бойитиш борасида янги имкониятлар юзага келмоқда. Президентимиз таъкидлаганидек, “Ўзбекистон халқи жонажон ўлкадаги беқиёс бойликнинг абадул-абад хақиқий эгаси бўлиб қолди”. Бу вазифа “силлиққина” амалга ошавермайди, балки, унинг назарий жиҳатларини илмий таҳлил қилиш, амалиётга тадбиқ қилишнинг асосий йўналишларини ишлаб чиқиш ва бу жараёнга салбий таъсир кўрсатиши мумкин бўлган таҳдидларнинг олдини олиш зарур бўлади.