Чиқинди таркибидан пахтани самарали ажратиш ва тозалаш учун такомиллаштирилган регенератор

Аннотация

Диссертация мавзусининг долзарблиги ва зарурати. Жаҳонда тўқимачилик саноатининг асосий хомашёларидан бири пахта толаси ҳисобланади. Дунё статистикаси ва пахта бўйича Халқаро консультатив қўмита (ICAC) маълумотларига кўра «пахта толасини экспортёрларига АҚШ, Ҳиндистон, Австралия ва Бразилия ҳамда импортёрларига Бангладеш, Ветнам, Хитой, Туркия ва Индонезия мамлакатлари киради»1. Пахтага дастлабки ишлов бериш техника ва технологияларини такомиллаштириш орқали ускуналар иш унумдорлигини, тозалаш самарадорлигини яхшилаш, ишлаб чиқарилаётган тола, чигит ва момиқнинг сифатини оширувчи техникаларни яратишга катта эътибор қаратилмоқда. Пахта тозалаш ускуналарининг шўткали барабанларини ейилиши натижасида кўп миқдордаги пахта чиқинди таркибига қўшилиб кетиши маълум. Амалдаги пахта регенераторларининг чиқинди таркибидаги пахтани регенерациялаш эффекти 90-95 % ни, иш унумдорлиги эса 1000 кг/соатни ташкил этади.