Пневмотранспорт қурилмаси элементларини такомиллаштириш

Аннотация

Диссертация мавзусининг долзарблиги ва зарурати. «Жаҳон бозорида табиий махсулотлар, хусусан, табиий пахта толасидан тайёрланган тўқимачилик ва енгил саноат махсулотларига талаб доимо юқори бўлган ва интенсив равишда ортиб бораётган аҳоли сони ҳисобига бу талабнинг истиқболда ортиб бориши кутилмоқда. Ҳар йили дунё миқёсида 23-24 млн. тонна атрофида пахта толаси ишлаб чиқарилади, лекин унинг йиллик истеъмоли 0,5-1,0 млн тоннага кўп. Етишмаган тола хажми хомашё захиралари ҳисобига қопланмоқда»1. Шунинг учун, жаҳон миқёсида пахта етиштириш қишлоқ хўжалигининг истиқболли тармоқларидан ҳисобланади ва нафақат АҚШ, Хитой, Хиндистон каби пахта етиштириш бўйича етакчи мамлакатлар, балки барча пахта етиштирувчи мамлакатларда пахта толаси истеъмол хусусиятларини яхшилаш, бозор талабларига мос келадиган махсулот ишлаб чиқариш, унинг сотилиш нархлари тушиб кетмаслигини таъминлаш, уни ишлаб чиқариш харажатларини камайтириш орқали махсулот таннархини пасайтириш йўли билан уни ишлаб чиқариш самарадорлигини таъминлаш масалалари соҳа истиқболини ҳал қилувчи масалаларга айланган.