Қадимги Хоразм мудофаа иншоотлари

Аннотация

Ўрта Осиё жаҳон цивилизациясининг энг қадимги марказларидан бири. Бу ҳудуд халқи томонидан бой ва ўзига хос маданият яратилган. Ўрта Осиё халқлари маданияти сарчашмаларини излаб топадиган археологлар ва тарихчиларнинг тадқиқотлари туфайли тарихий-археологик соҳа тобора аниқ намоён бўлмокда. Зардуштийларнинг диний матнлари тўплами «Авесто» энг қадимги Ўрта Осиё тарихининг жуда муҳим манбаи ҳисобланади. Унинг биринчи боби «Видевдат»да Марказий Осиёдаги, шунингдек унга бақамти бўлган Афғонистон ва Шимоли-шарқий Эрон ҳудудларидаги мамлакатлар-нинг Ахура Мазда томонидан тузилган рўйхати, жумладан, Арьянам Айжа, «Гова, суғдлар макони», «қудратли ва мўмин Моури (Марв вилояти)», «байроқлари баланд кўтарилган, гўзал Бахди (Бақтрия)», «Моури ва Бахди оралиғидаги Нисайа», Ҳорайва (Ҳирот вилояти) ва жануби-шарқдаги Ҳинд ҳамда Харвати (Арохсия) ҳудудларигача бўлган бошқа вилоятлар, жанубда Ҳилманд водийсидаги Хайтуманта, ғарбдаги гурганжлар, Раг (Мидиянинг шимоли-шарқида) ва ҳ.к.лар зикр этилган.